صباحكم سكر زيادة!!!

إيه أخباركم ؟؟؟ أما زلتم تكتبون ؟؟؟ يا ترى أكلتم إيه النهاردة ؟؟؟ مبسوطين ؟؟؟ بالكم مرتاح ؟؟؟ مشاكلكم إنتهت؟؟؟ 

لحوالى أربعة أشهر لم أكتب موضوعات جديدة…كنت قد إنقطعت عن التدوين و ما زلت أجد أعداد القراء لمدونتي يزداد دائما … لا أدري إن كان هذا بسبب خطأ في عدادات الزوار بالمدونة أم أن القراء ما زالوا متابعين لما أكتب.

كثيرا ما أجد شخصا أو أكثر يرسلون لي و يستفسرون يعلقون على أحد الموضوعات التي كتبتها منذ فترة… و هذا دليل على متابعة المدونين و القراء لمدونتي…و كلما قرأت أحد التعليقات الجديدة على موضوعات قديمة فإنني أعيد قراءة الموضوع … و عندما أقرأ ما كتبت فإنني أندهش!!! هل أنا من كتبت هذا المقال ؟؟؟!!! يبدو أنني كاتب جيد بالفعل!!! و عندما أفكر في الكتابة مرة أخرى أجد نفسي عاجزا عن كتابة حرف واحد!!! لماذا ؟؟ لا أعرف.

أحاول إستعادة لياقتي في الكتابة !!! و أرجو مساعدتي و إقتراح الموضوعات التي سنتناقش حولها !!! هناك الكثير من الموضوعات التي أرجو الحديث حولها و لي فيها وجهة نظر… ليس من بينها موضوعات عن البطالة أو التخلف الفكري أو جهل أهل القمة و إنفصالهم عن الواقع… كل تلك الموضوعات تعتبر موضوعات منتهية الصلاحية… موضوعات تم قتلها بحثا… و إنتهت إلى لا شيء … إنتهينا إلى أن هذا واقع لابد منه…و لابد أن نتعايش معه.

سمعنا عن فتاوي عجيبة … تصلح أن تكون جزءا من برنامج ساعة لقلبك… رأينا نوابا يصلحون أن يدخلون التاريخ بمناقشاتهم الكوميدية و أداؤهم التمثيلي المتميز.

رأينا و سمعنا و شاهدنا كيف يدخل نواب مجلس الشعب السجن على الرغم من وجود حصانة برلمانية… و شاهدنا فتيات الليل على القنوات الفضائية يتحدثن كأبطال و كأصحاب مواقف.

شاهدنا دموع الرجال و هي تنساب من أعين أعينهم على أحوالهم المتدهورة.  

أعتقد أنكم بخير حال … فالحكومة تقول أن مصر آمنة… و أنا بأصدق كلامهم … و الرئيس بيقول أنه بيدعم الغلابة و أنا مصدقه… بيتعبوا جدا الناس دول!!!

عن ماذا أتحدث في كتاباتي القادمة؟؟؟ عن الغلاء؟؟ عن الدولة الصديقة إسرائيل؟؟؟ أم عن أمجاد الماضي ؟؟؟

أنابوليس مثلا؟؟؟ هي شكلها إيه؟؟؟ جميلة  زي تسيبي ليفني ولا فلقة قمر شبه جولدا مائير؟؟؟ هي مش أنابوليس دي واحدة ست؟؟؟ إله الشر عند قدماء المصريين كان برضه ست!!!!!!!! أنا بأخرف ولا حاجة ؟؟؟ حاسس كدة و الله أعلم زي ما أكون شارب حاجة لونها أصفر … أصلي قاعد في الشغل بقالي كتيييييييير!!! أشعر كأنني أعاني من حالة بصاق فكري!!! و ربما يكون تشخيص حالتي -(ما فيش نقطة فوق الحاء)- أنني لامسني جني أو عندى مرض الهرتلة الإنبعاجية في الفكر الأقحواني (كلام كبير مش كدة؟) …  طموحي أن أحصل فقط على مليون جنيه و أعيش حياتي عاطلا … أكتب فقط في المدونات و ألعب بلاي ستيشن و أتفسح و أشتري سندوتشات تلوث من زوزو النتن… نفسي أفرغ ذهني تماما للحاجات المهمة دى!!! أصل دي الحاجة اللي الواحد بيلاقي نفسه فيها!!! اللعب … و إسألوا لعيبة الكورة … و بلاش أساتذة الجامعة علشان دول ناس كشرين و دمهم واقف و بيحسدوا لاعبي الكرة على النعمة التي أنعم الله عليهم بها!!! ناس بتلعب و بتحافظ على صحتها بالرياضة و بتسافر برة و تاخد شهرة …. و مش دافعين حاجة…. دول بياخدوا فلوس و كتير جدا…. على اللعب!!!!!!!!! طب ما إحنا عندنا برضه موظفين ووزراء شغلتهم اللعب علينا… و فيه شعب منقاد برضه بيلعب بس في مناخيره و مش بياخد حاجة غير صباع ممبار !!!!!! 

حالة قرف من الجرائد!!!!!!!!! كل يوم إسرائيل و العرب و أمريكا و حاجة تقرف… الإخوان عايزين يحكموا مصر … و الحكومة مش بتكتب إسمهم في الجرائد … بتكتب المحظورة… هاهاهااااي …. حكومتنا دمها خفيف…. عندها عبقرية زائدة … بس الشعرة بين العبقرية و العبط طارت و بقت حكومتنا بتهرتل!!!

اليهود الوحشين هما اللي طيروا الشعرة دي …. هما السبب في حالة الغباء اللي عندنا!!! هما اللي قالوا لشيوخ الكليبات يصدروا فتاواهم عن البول و خلت الناس تضحك عليهم… و خلت الراجل بتاع فتوى إرضاع الكبير يقول كلامه اللي زي السكر … و الغريبة إن الناس واخدة الموضوع بجد !!! و الجرايد كانت بتهاجمه … ليه ؟؟ سيبوه يعبر عن نفسه … هو الراجل ما لوش نفس يبقى مشهور برضه؟؟؟ إحترموا فكره دة إنتم بتنادوا بحرية التعبير!!!

رئيس وزارتنا كان عايز يعمل بطل قومي و ينقل العاصمة … و الجرايد تكتب … و الستات تزغرد … و الرجالة تقول الله أكبر … و ييجي الريس الكبير يضرب كرسي في الكلوب و يطلع شكل الحكومة زي الـUnder Wear .

طب الواحد هيكتب عن إيه ؟؟؟ ممكن أكتب عن أغنية رائعة لمطرب رائع لا أعرف إسمه… يقول مطلع الأغنية:

الدنيا خربانة… و الله خربانة !!!  كلمات أكثر من رائعة … و لحن أعظم من ألحان باخ و بيتهوفن و العظيم سعد الصغير!!! كلمات صحيحة من مطرب غلط تعبر عن أحوال المجتمع !!!

سلام دلوقت علشان أنا داخل الحمام!!!